ກະຊວງການຕ່າງປະເທດ ຈັດພິທີປະດັບຫຼຽນກາມິດຕະພາບໃຫ້ແກ່ ຜູ້ຕາງໜ້າອົງການສະຫະປະຊາຊາດ ເພື່ອການພັດທະນາ ປະຈໍາ ສປປ ລາວ

  ໃນວັນທີ 25 ສິງຫາ 2026, ທ່ານ ອານຸພາບ ວົງໜໍ່ແກ້ວ, ຮອງລັດຖະມົນຕີກະຊວງການຕ່າງປະເທດ, ໄດ້ຕາງໜ້າໃຫ້ ລັດຖະບານ ແຫ່ງ ສປປ ລາວ, ປະດັບຫຼຽນກາມິດຕະພາບໃຫ້ແກ່ ທ່ານ ນາງ ມາຕິນ ເທເຣີ, (Ms. Martine Thérer), ຜູ້ຕາງໜ້າອົງການສະຫະປະຊາຊາດ ເພື່ອການພັດທະນາ (United Nations Development Programme – UNDP) ປະຈໍາ ສປປ ລາວ, ເນື່ອງໃນໂອກາດທີ່ຜູ້ກ່ຽວໄດ້ສໍາເລັດການປະຕິບັດໜ້າທີ່ຢູ່ ສປປ ລາວ, ໂດຍມີການເຂົ້າຮ່ວມຂອງບັນດາກົມກ່ຽວຂ້ອງຂອງ ກະຊວງການຕ່າງປະເທດ, ກະຊວງການເງິນ ແລະ ຫ້ອງການຜູ້ປະສານງານອົງການ ສປຊ ປະຈໍາ ສປປ ລາວ. 
         ທ່ານ ນາງ ມາຕິນ ໄດ້ຮັບການແຕ່ງຕັ້ງໃຫ້ດໍາລົງຕໍາແໜ່ງເປັນຜູ້ຕາງໜ້າອົງການ UNDP ນັບແຕ່ເດືອນ ມິຖຸນາ 2023 ເປັນຕົ້ນມາ ແລະ ຈະສໍາເລັດການປະຕິບັດໜ້າທີ່ໃນທ້າຍ ເດືອນ ສິງຫາ 2026. ທ່ານ ນາງ ມາຕິນ ແລະ ອົງການ UNDP ປະຈໍາ ສປປ ລາວ ໄດ້ປະກອບສ່ວນອັນສໍາຄັນເຂົ້າການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ຄັ້ງທີ IX, ການສ້າງແຜນພັດທະນາເສດຖະກິດ-ສັງຄົມແຫ່ງຊາດ ຄັ້ງທີ X ແລະ ການສະໜັບສະໜູນຂະບວນການກອງປະຊຸມໂຕະມົນ ກໍຄືການປະກອບສ່ວນໂດຍລວມເຂົ້າໃນການພັດທະນາເສດຖະກິດ-ສັງຄົມ, ວຽກງານເກັບກູ້ລະເບີດບໍ່ທັນແຕກ, ການຈັດຕັ້ງປະຕິບັດວາລະ 2030 ເພື່ອການພັດທະນາແບບຍືນຍົງ ແນໃສ່ສະໜັບສະໜູນໃຫ້ ສປປ ລາວ ສາມາດຫຼຸດພົ້ນອອກຈາກສະຖານະພາບດ້ອຍພັດທະນາ. 
         ໃນໂອກາດດັ່ງກ່າວ, ທ່ານ ນາງ ມາຕິນ ເທເຣີ ໄດ້ກ່າວຄໍາເຫັນສະແດງຄວາມຂອບໃຈຢ່າງສູງມາຍັງ ລັດຖະບານ ສປປ ລາວ ທີ່ໄດ້ຮັບຮູ້ການປະກອບສ່ວນສໍາຄັນຂອງຕົນກໍຄືອົງການ UNDP ພ້ອມທັງໃຫ້ການຮ່ວມມືທີ່ດີກັບອົງການ ຕະຫຼອດໄລຍະຜ່ານມາ, ໂດຍສະເພາະໃນໄລຍະທີ່ຜູ້ກ່ຽວປະຕິບັດໜ້າທີ່ຢູ່ ສປປ ລາວ ແລະ ພ້ອມທັງໃຫ້ຄວາມໝາຍໝັ້ນວ່າ ອົງການ UNDP ຈະສືບຕໍ່ເພີ່ມທະວີການຮ່ວມມື ແລະ ສະໜັບສະໜູນບັນດາແຜນພັດທະນາເສດຖະກິດ-ສັງຄົມ ແລະ ບູລິມະສິດຕ່າງໆຂອງລັດຖະບານລາວໃນຊຸມປີຕໍ່ໜ້າ.